Laugardagskvöld

Ég fór út að borða og á kaffihús í kvöld með Evu og Ástu. Það var mjög fínt. Þær eru báðar að vinna á elliheimili með læknisfræðinni hérna og Ásta sagði mér frá gamalli konu sem þættist vera blind, en svo er starfsfólkið alltaf að bösta hana við alls kyns hluti sem sýna fram á að hún sér ekkert verr en margir aðrir. Svo kallar hún starfsfólkið stundum hans hátign og hneigir sig og stundum er Ásta tengdamamma hennar. Ég þarf að fá mér eitthvað svona starf!
Þær voru að fara að vinna svo ég fór bara heim um tíuleytið. Ég talaði við Eivor á msn, hún býr í Þýskalandi en tókst samt að fá mig til að sjá tilganginn í því að skella mér aftur út á lífið, hringdi meir að segja í Hröbbu sem var stödd í partý hjá einni sem er að spila með henni, frá Noregi og Viktor og Stulli náðu í mig í nýja flotta bílnum þeirra Viktors og Hröbbu. Þau voru að kaupa sér stóran 7 manna Toyotu (eitthvað) með DVD spilara niður úr loftinu og allar græjur, brjáááálæðislega flottur. Í partýinu voru líka Drífa Hröbbusystir sem er líka að spila handbolta, bara í Berlín í Þýskalandi, norska parið og Matta, kærastan hans Stulla sem er líka að spila handbolta hér í Århus. Þetta var mjög gaman og Drífa, Stulli og Matta fóru niðrí bæ áðan í feikna stuði, en sjálfsvorkunnar-ég ákvað að fara bara heim að sofa, ekki alveg í stuði til að tjútta. Ég á svo fáránlega bágt með að lifa fyrir líðandi stund að það er ekki fyndið. Í stað þess að njóta þess að vera með svona skemmtilegu fólki í brjálæðislega góðu veðri á Fest uge, þar sem uppákomur eru á hverju horni, fletti ég gömlum mogga sem ég tými ekki að henda, þó svo að ég hafi drepið köngurló með honum og finnist soldið ógeðslegt að fletta honum! Mér er ekki viðbjargandi.
Jæja, nú er ég farin að sofa.
Bæjó í bili þó.